شێعره‌سات

جيهاني وبلاگ نووسي جيهانيكي تازه‌يه و به داخه‌وه درگاي ئه‌و جيهانه دره‌نگ له ئيمه كرايه‌وه به‌لام چار نيه و ده‌بي بيگه‌يني به‌و هيوايه‌ي هيچمان بو گوتن /لاني كه‌م به خومان پي بي سوزه‌ني 27/9/83/

دوشنبه، دی ۲۴، ۱۳۸۶

ناساندن




له‌م دواییه‌دا، سایتی شارنیووز له‌ به‌شی ناساندنی خۆی دا لوتفی کردوه‌ و منی به‌ ئاسمان و خه‌ڵکی شاره‌که‌م ناساندوه‌ و پێشینه‌ی کاری ئه‌ده‌بیی و ره‌خنه‌ییه‌کانمی هاوردۆته‌وه‌ و ناونیشانی وێبلاگ و ئیمه‌یله‌که‌می داناوه‌ و تا خوابڵێ به‌سه‌ (نازانم بۆ ئه‌وه‌نده‌) تاریفی داوم.



http://www.sharnews.com/nasandn/na049.htm



ئه‌وه جێی سپاس و پێزانینه‌ و ماڵی زه‌وینی و ئاسمانییان ئاوه‌دان.... به‌ڵام تکایه‌ ئه‌گه‌ر ده‌کری ئه‌و هه‌ڵانه‌ی ژێره‌وه‌ راست بکه‌نه‌وه‌؛



1- من رێک به‌ پێچه‌وانه‌وه‌ له‌ ساڵی 57 ه‌و ده‌ستم داوه‌ته‌ قه‌له‌م و له‌ 62دا زیندانم ناسیوه‌( 5ساڵ که‌ ساڵێکم کێشاو 4ساڵی کرا به‌ ته‌علیقی واته‌ به‌ سه‌نه‌د ئازاد بووم)



2- له‌ به‌شی کاری شانۆیی دا تکایه‌ ناوی شانۆی "دیاری"‌ بکه‌نه (کایه‌)‌



3- له‌ به‌شی کاری ره‌خنه‌یی دا تکایه‌ کتێبی" نالی و خوێندنه‌ نوێیه‌کانی سه‌رده‌م" ی پێ زیاد بکه‌ن. ئه‌م کتێبه‌ له‌ سلێمانی، له‌ لایه‌ن بنکه‌ی رووناکبیری ئێل به‌گی جاف ه‌وه‌ بڵاو کراوه‌ته‌وه‌ و سایتی چل چه‌مه‌ له‌ به‌شی کتێب دا دایبه‌زاندوه‌



4- له‌به‌شی دوایین کاره‌کاندا(ژماره‌ 8 ی شێعر) " شه‌و له‌ من و له‌تۆ و له‌کێ، وێبلاگێک داده‌گیرسێنم" راست بکه‌نه‌وه‌. ئیتر سپاس

پنجشنبه، دی ۲۰، ۱۳۸۶

ماچتده‌که‌م و فرمێسک



ماچتده‌که‌م و فرمێسک


(3)



کێشه‌ی بوون و ره‌وایه‌ته‌ گه‌وره‌کان



کاتی خۆی سارتر له‌ کتێبی بوونگه‌رايی فه‌لسه‌فه‌ی مرۆڤايه‌تييه‌1"دا نووسی؛


" ئه‌وه‌ ده‌خه‌نه‌ پاڵمان که‌ ئێمه‌ جه‌خت له‌ ریسوایی مرۆڤ ده‌که‌ین و له‌ هه‌موو شوێنێکدا ئه‌وه‌ی پێس و دووڵی و قیزه‌وه‌نه‌ ده‌یخه‌ینه‌ روو، به‌مه‌ش، به‌ بڕوای ئه‌وان لایه‌نی رووناک له‌ لایه‌نه‌ جوان و بێگه‌رد و بێخه‌وشه‌کانی سروشتی مرۆڤ پشت گوێ ده‌خه‌ین .. لێره‌ و له‌وێ بانگه‌شه‌ی ئه‌وه‌ ده‌که‌ن که‌ ئێمه‌ له‌ هاوکاری مرۆیی دوور که‌وتوینه‌ته‌وه‌ و له‌ جیهانمان دابڕیوه‌ و له‌ نێو تاکێتی خۆیدا گه‌مارۆمان داوه‌، ئه‌وه‌ش له‌به‌ر ئه‌وه‌ی ئێمه‌ وه‌ک مارکسییه‌کان ده‌ڵێن: له‌ خودگه‌رایی په‌تی(ره‌ها)وه‌ ده‌ستپێده‌که‌ین، واته‌ له‌ کۆژیتۆی2 دیکارته‌و. به‌ مانایه‌کی دی؛ ئێمه‌ له‌و چرکه‌ساته‌وه‌ ده‌ستپێده‌که‌ین که‌ مرۆڤ له‌ دابڕینی خۆیدا ده‌رک به‌ خودی خۆی بکات، ئه‌مه‌ش ئێمه‌ی له‌ دیدی ئه‌واندا لاواز کردوه‌ که‌ توانای گه‌ڕانه‌وه‌مان نه‌بێ بۆهاوکاری کردن له‌گه‌ڵ هه‌موو ئه‌و خه‌ڵکانه‌ی که‌ له‌ده‌ره‌وه‌ی من (Lemoi يان Ego) دان و ناتوانین له‌ کۆژیتۆدا باسیان بکه‌ین..


مه‌سیحیه‌کانیش به‌وه‌ تاوانبارمان ده‌که‌ن، که‌ ئێمه‌ نکۆلی له‌ واقعییه‌تی کرده‌ مرۆییه‌کان و سووده‌کانیان ده‌که‌ین، چونکه‌ ئێمه‌ ئامۆژگاری و به‌هاکانی خودا لاده‌به‌ین، ئه‌و به‌هایانه‌ی له‌ هه‌تایی و نه‌مریدا کێشراون، به‌وه‌ش هه‌ره‌مه‌کێتی ره‌ها به‌رکه‌ماڵ ده‌بێ و مرۆڤخوازیاری چ بێت ده‌یکات و ناتوانێ حوکمڕانی را و بۆچوونه‌کانی که‌سانی دیکه‌ کرده‌وه‌کانیان بیت... ئه‌و تاوانه‌ سه‌ره‌کییه‌ی ئاراسته‌مان ده‌کرێت ئه‌وه‌یه‌؛ ئێمه‌ به‌ته‌نیا باس له‌ لایه‌نی خراپی ژیانی مرۆڤ ده‌که‌ین"



ره‌نگه‌ ره‌خنه‌ گران یان بینه‌رانی چالاکی شانۆی "ماچێک و فرمێسک" هه‌مان ئه‌و ره‌خنانه‌ی سه‌ره‌وه‌ ئاراسته‌ی نووسه‌ر یان ده‌رهێنه‌ری شانۆکه‌ بکه‌ن بۆ وه‌ی به‌رواڵه‌ت کابرای به‌ندیی له‌ هه‌مان دۆخی قیزه‌ون دایه‌ و له‌ هه‌ر دوو گوتاری کاتۆلیکی و ناکاتۆلیکی که‌وتۆته‌‌ گومان‌( واته‌ سێوه‌که‌ی بۆده‌رباز بوون له‌ گوتاری یه‌که‌م خواردوه‌ و ئێستا هه‌موو ئه‌و گوتارانه‌ش هه‌ڵدێنیته‌وه‌ که‌ سێۆخواردنه‌که‌ی بۆ پاستاو داوه‌ته‌وه‌(هه‌موو کتێب و رۆژنامه‌ و چاپه‌مه‌نیه‌کان.. ئه‌و سێوه‌که‌ی خواردوه‌ و نه‌ک چاک نه‌بووه‌ به‌ڵکوو زگئێشه‌یشی پێ زیاد بووه‌ و ته‌نانه‌ت ئیشتیای خوارنیشی لێ سه‌ندۆته‌وه‌... که‌وایه‌ به‌رده‌وام سێوه‌که‌ش ده‌رشێته‌وه‌... ( ناوی رۆمانی رشاننه‌وه‌که‌ی سارتر تان وه‌بیر ده‌خه‌مه‌وه‌) ئه‌و له‌و گومانکردنه‌دا فێره‌ پرسیار بووه‌ و به‌دوای گوتاری سێهه‌مدا ده‌گه‌رێ؛ تۆ بڵێی گوتاری سێهه‌م هه‌مان بوونگه‌رایی(ئیگزیستانسیالیسم) نه‌بێ؟ تۆ بڵێی وه‌ڵامی ده‌ق یان شانۆکه‌ به‌و پرسیارانه‌ی سه‌ره‌وه‌ هه‌مان وه‌ڵامه‌کانی سارتر بێ؟


"لێره‌ خه‌ریکم فێر ئه‌بم له‌وه‌ی وا بوونی نیه‌، هه‌ست به‌ بوونی ئه‌وه‌ی هه‌یه‌ بکه‌م" یاداشتی یه‌که‌م. (ئه‌وه‌ی که‌ سارتر پێی ئه‌ڵێ دیار‌ده‌ بناغه‌یی: Ontologie phenomenologi، یان دیاره‌ده‌ وه‌ک بناغه‌) "هه‌ر چه‌ند به‌ینێکه‌ زه‌مه‌نێکی بێکۆتاییم بۆ بیرکردنه‌وه‌ بۆره‌خساوه‌ به‌ڵام هێشتا بیرم له‌ هیچ نه‌کردۆته‌وه‌ له‌ خۆم نه‌بێ...."


- ئه‌مه‌وێ له‌ شته‌ بچووکه‌کان بیر بکه‌مه‌وه‌..


سارتر ئه‌ڵێ: بوونی مرۆڤ پێش ماهییه‌ت(بنه‌ره‌ت/چییه‌تی) كه‌وتوه‌"



واته‌ مرۆڤ به‌ هێچ شتێکی پێش خۆیه‌وه‌ ناناسرێته‌وه‌ به‌خۆیه‌وه‌ نه‌بێ،،، به‌ پێچه‌وانه‌ی بۆچوونی پیاوی ئایینی(که‌سایه‌تی شانۆکه‌) که‌ به‌ر ده‌وام بۆ ناساندنی مرۆڤ و کێشه‌کانی مرۆڤ ده‌گه‌رێته‌وه‌ بۆ نووح و که‌ره‌کانی نووح و ئه‌وه‌ی که‌ ئه‌وان مرۆڤیان فێری بیرکردنه‌وه‌ کرد وگوایه‌ هه‌مان "بیرکردنه‌وه‌ گه‌نده‌ڵی کردووین" و شتی وا.... کابرای به‌ندی دوای هه‌موو بیرلێکردنه‌وه‌کانی به‌و ئه‌نجامه‌ ده‌گا که‌ فه‌یله‌سووفانی وجوودێ (كێرکێگارد و هایدگێر) و دواترسارتر، پێشتر پێی گه‌ییون؛‌ واته‌ خۆم له‌ هه‌موو شتێ گرێنگترم


سارتر ئه‌ڵێ: "مرۆڤ له‌ خودی خۆیدا له‌وه‌ زیاتر که‌ ده‌یکات و پێی هه‌ڵده‌سێت چیدیکه‌ نیه‌. ئائه‌مه‌یه‌ یه‌که‌م پرنسیپی بوونگه‌رایی" هه‌مان سه‌رچاوه‌


کابرای به‌ندیش له‌ شانۆکه‌یدا ده‌ڵێ؛


"ئیتر رۆژێ ترم نیه‌ له‌گه‌ڵ خوا و شه‌یتان] به‌شی بکه‌م. ته‌نیا ده‌رفه‌تم هه‌یه‌ له‌ رابردووم بڕوانم .. له‌ رابردووم ئه‌روانم و ئه‌بینم هه‌میشه‌ له‌ شتی گه‌وره‌ بیرم کردۆته‌وه‌. به‌لام له‌گه‌ل شته‌ بچووکه‌کان ژیاوم. من له‌گه‌ڵ بێوه‌سیریه‌که‌م ژیاوم، له‌گه‌ڵ ده‌سکه‌ تیانه‌ توند نه‌کراوه‌کان، له‌گه‌ڵ کولێره‌کان، له‌گه‌ڵ ژێرده‌رپێ کامواییه‌که‌م .. له‌گه‌ڵ هۆجه‌نه‌ی ده‌رپێکه‌م، له‌گه‌ڵ دیانه‌کیڕه‌، ئه‌مانه‌یه‌ مامۆستا! عه‌یبێ له‌کاری دنیادا هه‌یه‌.."


(دنیایه‌ک که‌ پێشتر به‌ ره‌وایه‌ته‌ گه‌وره‌کان‌ پێناسه‌ کراون)


ئه‌گه‌ر واز له‌ په‌شێوی، نیگه‌رانی و دڵه‌خورپێ. ناهمێدی و دۆخی قیزه‌ون و ره‌شبینی و به‌تایبه‌ت بیره‌وه‌ری و ئه‌و چه‌مکانه‌ بێنین که‌ سارتر له‌ هه‌مان کتێبدا به‌ وردی له‌هه‌موویان ده‌کۆڵێته‌وه‌ و له‌م شانۆشدا هه‌ر هه‌موویان به‌له‌ونێ له‌ جووڵه‌ و سیما و کایه‌ی ئه‌کته‌ره‌کانی دا به‌رچاوه(به‌س بڕواننه‌ پات بوونه‌وه‌ی بازنه‌ی وشه‌گه‌لی وه‌ک گوو، میز، چڵک،قین، رق، رشاننه‌وه‌ و...تاد. بۆوه‌ی قیزه‌ونی دۆخه‌که‌تان باشتر له‌ لا به‌رجه‌سته‌ ببێته‌وه‌؛


- "ماتیکی لێوتان.. ناوی چییه‌؟


- نیه‌تی. له‌م نێوه‌ گووانه‌یه‌..وا...ببووره‌


- تامی چی ئه‌دات؟


- جاری هه‌ر تامی گوو ئه‌دات... ببووره‌! .. ئه‌مزانی گووی تێدێت.. ئه‌ح..گوو" )


جێی خۆیه‌تی ئه‌گه‌ر ئاماژه‌یه‌کیش به‌ چه‌مکی رۆچوونی مرۆڤ له‌م روانگه‌وه‌ بێته‌ ئارا؛


سارتر ئه‌ڵێ: " ئێمه‌ له‌و بڕوایه‌داین که‌ مرۆڤ رۆچۆته‌ نێو دۆخێکی رێکخراوه‌وه‌"


له‌ شانۆکه‌شدا کابرای بازجوو ئه‌ڵێ؛


"نه‌ک ماتڵ بیت ئه‌و ته‌پاڵه‌ته بۆ راگرن که‌ نوقم نه‌بیت! چونکو ئه‌وانیش وه‌ک خۆتن. ئه‌و ته‌پاڵانه‌ په‌له‌قاژه‌یانه‌ نه‌که‌ونه‌ بن(ئه‌گه‌ر مه‌به‌ست هه‌مان جوانه‌ ژن و که‌سانی وه‌ک ئه‌و بێ كه‌ په‌ێجووری په‌روه‌نده‌که‌ی ئه‌من و زریوه‌ی ماتیکی خوێنینی لێویان رۆژه‌رێیه‌ک ده‌ڕوا، یان ئه‌و به‌ ناو هاوه‌ڵانه‌ی که‌ له‌ده‌ره‌وه‌ن و له‌ هه‌وڵێ ئازادی که‌سانی وه‌ک کابرای نووسه‌ردان).‌ که‌س له‌ت و په‌ت نابێ، ئێمه‌ هه‌ر ئه‌ڕژێنه‌ خوار.. رۆچوون."


ده‌بینین که‌ نووسه‌ر و ده‌رهێنه‌ری شانۆ باش لێک گه‌یشتوونه‌ و له‌ دۆخێکی قیزه‌ونی دیکه‌دا هه‌مان دۆخی قیزه‌ونیان نواندۆته‌وه‌ که‌ سارته‌ و نووسه‌رانی وجوودی کاتی خۆی له‌ چیرۆک و رۆمان و کتێبه‌کانیاندا دایانه‌وه‌ به‌ رووی ره‌وایه‌ته‌ گه‌وره‌کانی پێش خۆیان. ئه‌و ره‌وایه‌تانه‌ی که‌ ده‌سه‌ڵاتی زمانیی سه‌رده‌میش لێیانی تێنه‌په‌ڕاندوه‌ و به‌رده‌وام ده‌نوێنرێنه‌وه‌( به‌ ده‌مامک یان بێ ده‌مامکه‌وه‌)3


له‌م روانگه‌وه‌ نموونه‌ بۆ به‌راوه‌ر‌دی بۆچوونه‌کانی سارتر و نووسه‌ر و ده‌رهێنه‌ری "ماچتده‌که‌م و فرمیسک" زۆره‌ به‌ تایبه‌ت له‌ سه‌ر چه‌مکی( من و ئه‌وی دیکه‌) یان (دۆخی تایبه‌ت) که‌ مارکسیسته‌کان مشت و مڕی باشیان له‌گه‌ڵ کردوه‌ وله‌ هه‌مان سه‌رچاوه‌دا خوێنه‌ران ده‌توانن بیخوێننه‌وه‌ و به‌راوه‌ردی بکه‌ن و ئه‌وه‌ش داده‌نێین بۆ چالاککردن یان مه‌یداندان به‌ بینه‌رانی شانۆکه،‌ بۆ زێده‌تر‌ به‌شدارکردنیان له‌ ماچتده‌که‌م و فرمێسکدا...


ماویه‌تی



==


1- ئه‌م کتێبه‌ له‌ لایه‌ن رۆشنا ئه‌حمه‌‌د ره‌سوڵ ه‌وه‌ کراوه‌ به‌ کوردی و ده‌زگای چاپ و په‌خشی سه‌رده‌م بڵاوی کردۆته‌وه‌.


2- کۆژیتۆ= به‌مانای بیر ده‌که‌مه‌وه‌(که‌ واته‌ من هه‌م) دیکارت


3- مه‌به‌ست شیکردنه‌وه‌ یان راڤه‌کاری شانۆکه‌یه‌ نه‌ک لایه‌نگری کردن یان هه‌ڵوێست گرتن له‌به‌رامبه‌ر وجوودیه‌تدا. بۆ وه‌ی ئه‌وه‌ پێشتر کراوه‌ و له‌ توانای ئه‌م خوێندنه‌وه‌شدا نیه‌.

پنجشنبه، دی ۱۳، ۱۳۸۶

ماچێک و فرمێسک 2



چێژی ماچ و ره‌نج ی ژیان




ماچێک و فرمێسک وه‌ک تێکست نووسینی محه‌مه‌دی چه‌رمشیره و وه‌ک خۆی نووسیویه‌ خوێندنه‌وه‌یه‌که‌ له‌ نامه‌کانی واتسلاو هاوڵ بۆ ئێلێگای هاوسه‌ری به‌و پێیه‌ فه‌زای گشتی شانۆکه‌ به‌ندیخانه‌یه‌ و فۆرمی نواندن،به‌شێوه‌ی بچربچڕ خوێندنه‌وه‌ی‌ یاداشتگه‌لێکه‌، له‌ نێوان رووداوه‌کانی ژیان یان ژینه‌مه‌رگی نووسه‌رێکی یه‌خسیر، که‌ تووشی بڤه‌ی گومان له‌ شته‌ گه‌وره‌کان (سێوخواردن و تاوانی یه‌که‌م) بووه‌‌؛


- لێره‌ بیری خوا و ژن بکه‌..


- ئه‌مه‌وێ له‌ شته‌ بچووکه‌کان بیر بکه‌مه‌وه‌"


خوێندنه‌وه‌ی راسته‌وخۆی یاداشته‌کان له‌که‌شیی بێ نووری قیر ئاسای ناو هۆڵه‌که‌، له‌ زێهنی بینه‌ردا به‌راستی ناله‌باریی و تاریکییه‌که‌ ‌به‌رجه‌سته‌ ده‌کاته‌‌وه و ئه‌مه‌ ده‌سپێکی شانۆکه‌یه‌ .. ره‌نگه‌ تێکست هه‌ر له‌ سه‌ره‌تاوه‌ مستی خۆی بۆ بینه‌ر کردبێته‌وه؛


" ئێره‌ کپ و تاریک و ناله‌باره‌، لێره‌ هه‌موو شتێ ئه‌توانێ ناهمێوت کات، له‌ هه‌موو شتێک ئه‌کۆڵمه‌وه.‌ لێکۆڵینه‌وه‌ی بێسوود، زیاتر ناهمێوم ده‌کا... هه‌ر چه‌ند به‌ینێکه‌ زه‌مه‌نێکی بێکۆتاییم بۆ بیرکردنه‌وه‌ بۆره‌خساوه‌ به‌ڵام هێشتا بیرم له‌ هیچ نه‌کردۆته‌وه‌ له‌ خۆم نه‌بێ..ئه‌مهه‌وێت کاتێ رزگار بووم له‌و که‌سانه‌ بیر بکه‌مه‌وه‌ که‌ به‌ندن. هه‌موو نیوه‌ شه‌وێکیش له‌ تۆ بیر بکه‌مه‌وه‌.. ماچێک و فرمێسک".


رووداوه‌کانی دوایی، وه‌ک هاتنی مامۆستای ئایینی و ئه‌خلاقییات بۆ خۆ شۆردن و نه‌خواردنی سێو و بیر نه‌کردنه‌وه‌ له‌ ژن، هاتنی خزمه‌تکار، بازجوویی و ئه‌شکه‌نجه‌ یان هاتنی ژنه‌که‌ی و جوانه‌ژن له‌ خوێندنه‌وه‌ی یه‌که‌م دا، هه‌موو ده‌که‌ونه‌ په‌راوێزه‌وه‌ بۆ وه‌ی به‌رده‌وام ماچ(به‌ نیشانه‌ی چێژ) و فرمێسک( به‌ نیشانه‌ی ره‌نج) وه‌ک چیرۆکی ئه‌زه‌لی و ئه‌به‌دی جیهانی بوون دوپات ده‌که‌نه‌وه‌ .. با جارێ له‌باری ئوستووره‌وه‌ پای ئاپولۆن و دیۆنیزۆس نه‌یه‌ته‌ ئاراوه‌.. له‌ خوێندنه‌وه‌ یان سه‌ره‌روانینی یه‌که‌م دا ته‌بایی و ناته‌بایی له‌م شانۆدا به‌س له‌و گۆشه‌ نیگاوه‌ ده‌که‌ینه‌ به‌رجه‌وه‌ن بۆ خوێندنه‌وه‌کانی دیکه‌؛


واته‌ هه‌موو به‌شه‌کانی شانۆ وه‌ک رووناکی(نوور) ره‌نگ، ئاکسیۆن و عه‌مه‌ڵی کاراکتر به‌ گشتی له‌ خزمه‌ت ئه‌و دوو گوتاره‌ دا دێنه‌ ته‌بایی و ناته‌بایی ماچ و فرمێسک؛


ژنی خزمه‌تکار و بازجۆکه‌ کابرای به‌ندیی به‌ره‌و چێژ هان ده‌ده‌ن؛


لێره‌ بیری خوا و ژن بکه‌.. ئه‌و ژنانه‌ی هێشتا نه‌تدیون.. ژنی خزمه‌تکار


ئه‌و ژنه‌ کاره‌که‌ره‌ بکێشه‌ ناو پێخه‌فه‌که‌ت.. که‌یفیان پێوه‌ بکه.. کابرای بازجوو


به‌لام پیاوی ئایینی بۆ ره‌نج و ریازه‌تی به‌رده‌وام ئامۆژگاری ده‌کا:


"من خۆشم له‌ سێو نایه‌ت هه‌ر وه‌ها له‌ ژنیش . تا لێره‌یت باشتر وایه‌ بیر که‌ ژن نه‌که‌یته‌وه‌


خۆش به‌ مه‌هێله‌ شتی بێبایه‌خ بتره‌نجێنێ" ده‌نگی زیندانیه‌که‌


خۆشم ئه‌وێیت به‌ فرمێسکه‌وه‌" ده‌نگی ژنی کابرا له‌ نامه‌کانیدا


من لام وایه‌ ده‌رهێنه‌ر هه‌ستی به‌و کۆک و ناکۆکییه‌ له‌خزمه‌ت پێکهاته‌(ساختار)ی کاره‌که‌یدا کردوه‌ هه‌ر بۆیه‌ له‌ رووناکی و رازاندنه‌وه‌ی سه‌حنه‌ و دابه‌شکردنی ئپیزۆده‌کان(شه‌ش به‌ش که‌ تاریکی و خوێندنه‌وه‌ی نامه‌کان ده‌که‌وێته‌ به‌ینیان) و ته‌‌نانه‌ت مۆسیقای هاورێ دا دوانه‌ی لێکدژی سووری تۆخ – خۆڵه‌مـێشی، که ‌وه‌ک خه‌نجه‌ر و قه‌ڵه‌م له‌ یه‌ک چه‌قیون، نوور و تاریکی(که‌ چه‌ند جار دووپات ده‌بنه‌وه‌) زرمه‌ی ده‌هۆل و ریتمی ئارام . هێنانه‌ ئارای یه‌که‌ یه‌که‌ی کاراکته‌ره‌کان( جار بۆ چێژ، جار بۆ ره‌نج) دێنه‌ کایه‌ و نواندن و لێدان...


12/10/86


ماویه‌تی


چهارشنبه، دی ۱۲، ۱۳۸۶

ماچێک و فرمێسک 1



"ماچێک و فرمێسک"



چیرۆکی ئه‌زه‌لی و ئه‌به‌دی مرۆڤ


یان


چڕبوونه‌وه‌ی سێبه‌ری ده‌سه‌ڵات



کاتژمێری 5 ی ئێواره‌ی رۆژی سێ شه‌ممه‌ی یازده‌ی به‌فرانبار( یه‌که‌می ژانوویه‌ی 2008)


شانۆی ماچێک و فرمێسک له‌ هۆڵی کۆبوونه‌وه‌کانی ئه‌ده‌بی - کولتووریی شاری سه‌قز هاته‌ پێشکه‌ش کرن.



له‌ په‌راوێزی شانۆکه‌دا، ئه‌وه‌ی له‌ یه‌که‌م نیگا به‌رچاو ده‌که‌وت؛


1- دوای چه‌ندین ساڵ کاری شانۆیی ئه‌مه‌ یه‌که‌م ده‌رهێنانی سه‌لاح محه‌ممه‌دی یه‌ که‌ به‌ شێوه‌یه‌کی ره‌سمی ئیزنی نواندن(پروانه‌ نمایش) وه‌رده‌گرێ


2- یاساورێسای به‌ڕێوه‌بردنی شانۆکه‌، که‌ هه‌ر له‌ بروشووری ره‌نگی دوازده‌ لاپه‌ڕیی ( خۆناساندنی گرووپی شانۆی شه‌وار به‌ ره‌سم و ئه‌زموونی شانۆییانه‌وه‌) و نامه‌کانی بانگهێششتن، جه‌خت کردنه‌سه‌ر تاکه‌که‌سیی بوون و رۆژی دیاریکردنی داوه‌ته‌که‌ و نه‌هاوردنی منداڵ وه‌ک مه‌رجی هاتن،‌ تا کردنه‌وه‌(به‌س یه‌کجار بۆ هاتنه ژووره‌وه‌ی بینه‌ران) و به‌ستنی درگای هۆڵ له‌کاتی ده‌سپێکردنی شانۆ و داواکاری بۆ کوژانه‌وه‌ی موبایل و قه‌ده‌غه‌کردنی ره‌سم گرتن و سووربوون له‌سه‌ر نه‌کردنه‌ ژووره‌وه‌ی منداڵی ژێر ده‌ساڵ و...به‌گشتی جه‌غتیان ده‌کرده‌ سه‌ر سازکردنی ئه‌خلاقێکی هونه‌ریانه‌ بۆ روانین له‌ شانۆ و جیاکردنه‌وه‌ی شانۆ له‌ شانۆبازار. ئه‌مه‌ ره‌نگه‌ به‌خوێندنه‌وه‌یه‌کی ئه‌مرۆژیانه‌تر به‌ستنه‌وه‌ی بینه‌ر و به‌رده‌نگ و رێنه‌دانیان بێ بۆ‌ به‌شداریکردنی ئازادانه‌ی ئه‌وان له‌ شانۆکه‌دا.. به‌ڵام له‌لایه‌کی دیکه‌وه‌ ( که‌ ئه‌مه‌یان ره‌نگه‌ مه‌به‌ستی ده‌رهێنه‌ری شانۆکه‌بوو) که‌ش و هه‌وایه‌کی ئارام و له‌بار و یه‌کده‌ستی بۆ ده‌نگ و رووناکی و جووڵه‌‌ سازکردبوو و یارمه‌تی بینه‌رانی ده‌دا که‌ راسته‌و خۆ دابه‌زنه‌ ناو ئه‌و فه‌زایه‌ی که‌ مه‌به‌ستی ده‌رهێنه‌ر بوو..


3- که‌م بوونی ژماره‌ی بینه‌ران، ره‌نگه‌ به‌بۆنه‌ی هه‌مان جیدی بوون له‌ سه‌ر ئه‌خلاقی نواندن، یان نه‌بوونی ریکلام و سه‌رمای زۆر و یه‌که‌م رۆژیی نواندن و فرۆشی بلیت و چۆنیه‌تی بانگهێشتنه‌کان و ...تاد. بووبێ، هه‌رچی بێ دڵنیام بینه‌رانی شانۆ له‌ سه‌قز یه‌کجار له‌ ژماره‌ی به‌شداربوان و بینه‌رانی یه‌که‌م رۆژ زێده‌ترن و هیوادارم له‌ پێشکه‌شکردنی رۆژانی دیکه‌دا وا نه‌بێ... هه‌ڵبه‌ت مه‌به‌ستم زۆر و بۆر نیه‌


4- ئه‌م شانۆیه‌ له‌هه‌مو لایه‌نێکه‌وه‌(مادی و مه‌عنه‌وی) له‌لایه‌ن گرووپی شانۆی شه‌وار وه‌ک گروپێکی سه‌ربه‌خۆ هاته‌ کایه‌ و له‌ هیچ لایه‌که‌وه‌ هێچ چه‌شنه‌ یارمه‌‌تییه‌ک( جگه‌ ئیزنی پیشکه‌شکرنی ده‌ رۆژه‌ له‌ هۆڵه‌که‌، له‌لایه‌ن ئه‌نجومه‌نی شانۆی سه‌قز و دایه‌ره‌ی فه‌رهه‌نگ و ئیرشادی ئیسلامی سه‌قز) نه‌درابوون.


ماویه‌تی

سه‌شنبه، دی ۱۱، ۱۳۸۶

2008



ساڵی نوێی زایێنی لای مه‌ به‌ شانۆوه‌ ده‌ست پێده‌کا..



نازانم بۆ به‌و هه‌موو دڵ ناخۆشیه‌وه‌ ساڵه‌کان ئه‌وه‌ند تیژ تێپه‌ڕ ده‌بن و ده‌ستمان به‌ گو.. ی هیچیان ناگات که‌ ئه‌وان له‌ که‌فاویش که‌وتوونه‌ و داویانه‌ته‌ ده‌ست ساڵێ تر؟!!


هه‌ر چی بێ ساڵی نوێی زایێنی له‌ هه‌موو ئه‌وانه‌ی ساڵی نوێیانه‌ و دڵخۆشن پێی


پیرۆز بێ


و


2007 یش به‌ سلامت و بڕواو نه‌یێته‌وه‌ بۆ وه‌ی له‌ دوایین رۆژه‌کانی دا ره‌حمی به‌ مه‌ڕ و ماڵاتی کوردیش نه‌کردو وه‌ک هه‌میشه‌ ...


- لێی گه‌ڕی با دیسان نه‌که‌وینه‌وه‌ سه‌ر سیاسه‌ت!


- باشه‌ به‌ چاوان


وا نه‌ڵێم چی بکه‌م؟


ئه‌ڵێن کابرایان ..... ئه‌یگوت: ...... (ها..ها.. ها..)


- ناوێری گوو بخۆی بۆ به‌زۆر ،،


- به‌ زۆر چی؟ ئه‌ی تۆ بۆ ناوێرێ بخۆی؟


- به‌س نیه‌ من هه‌ر باسیشی ناکه‌م


- ئه‌ی ئه‌وه‌ نیه‌ به‌ که‌وچکه‌وه‌ ئه‌په‌رێته‌ ناو زێهنی ئاڵۆزی من.. بۆ له‌کۆڵ نابیته‌وه‌


- باشه‌ ئه‌وه‌ من قوڕو قه‌پ!! ئه‌گه‌ر ئیتر خواردم


- ده‌ی بڕۆ به‌توونی ته‌ته‌ر


ئه‌مویست ئه‌وه‌ بڵێم که‌ ساڵی رابردوو ساڵێکی پر له‌ خۆشی بوو بۆمان و


- کوا ئه‌تویست ئه‌وه‌ بڵێی عه‌زه‌ب؟


- له‌کۆڵ ئه‌و بوومه‌وه‌ تۆ ئیتر کێی؟


- من خۆتم به‌دبه‌خت.. خۆ به‌زۆر نییه‌.. ناتهه‌وێ بنووسی بۆ له‌خۆ را ئه‌نووسی؟


- راسته‌ .. ئه‌مویست باسی شانۆ و سه‌ری ساڵی زایێنی بکه‌م


- ده‌ی باشه‌ فه‌رموو!


- جا چی بنووسم بۆ جه‌نابت ئێڵی ..